************************************************** ************************

[د. جنط السفينة]

بسم الله الرحمن الرحيم


http://www.graaam.com/up/Pic9/d0ad17a9d7.gif

لـيـتك يانـدومـه عـن الحال تـدري ××× الجـنـط من عقبك تجرع له امرار
من عقبكم يا صاحبي فاح صدري ××× مثل القدر يطبخ على واهج النار

كتبت هالموضوع وانا مستعجل مرة وعلى اني ادري انه عادي الا اني اتمنى اني اشوف رد لاخوي وحبيبي ابونديم

http://www.graaam.com/up/Pic9/4d2759618d.jpg

ابونديم عشاني الله يعلي شانك

***********

عمتم مساءً أيها القوم والقومات

نظرا للاقبال الملحوظ على مسابقة تصميم صورة الجنط فقط قررت حفظني الله زيادة الجوائز والتعديل عليه
لتصبح هتسذا :

1- انت مخير بين انك تصير مشرف بدال ابوشدز والا تاخذ معرف المهره لمدة شهر ونص وتحرر بكل متسان
2- اعطيك دورة بمعرفي لمدة شهر
3- بدال ماتصطر بندر المطيري وابوجلمبو فقط زدنا لك ميزة جديده فبعد التنسيق مع ابوانهم الان تستطيع قتل
الاشهبين الانف ذكرهم على كيفك وبأي طريقه تبيها وستحصل على تنازل خطي من ابوانهم قبل ماتقتلهم <<ياشين
الجنط لاصار يمون
4- فيلا ضخمه بحي النخيل تفتح على ثلاث طعش شارع
5- بطاقة سوا فئة خمس وعشرين ريال بس الي باقي به سبع طعش ريال تبيه والا بكيفك
6- بي ام دبليو الفين وسبعة الفئة السابعة ( الحوت )

ويحق لجميع سكان الكورة الارضيه المشاركه بالمسابقه الا العنز هايدي لأسباب سياسيه
وسيتم تسليم الجوايز بموضوع قادم اسمه
( تسليم جائزة نوبل لافضل تصميم لصورة الجنط )


*********************

مــــغـــامـــرات جـــنــــطــــيــــــة


بيوم عشرين رمضان الي فات حجينا انا واهلي ولله الحمد انواع التساهيل لازحمه ولا شي تصدقون عاد اننا رامين
الجمرة ست مرات وتصدقون بعد اننا مذرين لقدر الغدا بالحوض الي به ابليس الحمد لله حجينا بكل سهوله همن
رجعنا وبعد خمسة ايام وتحديدا يوم ثمان وعشرين شعبان وحنا صايمينن الست جتن امي
وقالت : يالله ياجنط قم رح اشتر ضحايا
قلت : وش ضحاياه
قالت: ضحايا العيد
قلت : اما عاد وهالشهر الي صمناه لايصير بس ذو القعده ترى تسويه الحكومه
قالت : لا بس مثلك عارف عيد الضحيه يبي يكون بالشتاء ووقت الطلعات قلت نقدم الضحايا هالحين ونكشت بعيد
الضحيه
قلت : اي والله انتس صادزه
قالت : بس لاتشتريهن من هايدي ترى كل غنمه عليهن قل صح من اكل الكراتين والاكياس
قلت : اصلا متزاعلين انا واياه
قالت : يالله وش تحتري قم اشترهن بسرعه
قلت : يدتس على الف وثلاث ميه
قالت : اندزلع بس وشوله شايلتك ببطني تسعة اشهر
قلت : لاحول ولا قوة الا بالله كل مابغيتي تسرقينن قلت تسعة اشهر تسعة اشهر ياختي انا مستعد اشيلتس ببطني
اربع سنين بس انت ادفعي الالف وثلاث ميه
مادريت الاحطت سعبول على اصبعه ومسحت به خشمه وقالت لا ييبس خشمي الاك جاي
انا عاد يوم شفت الدعوه تسذا استسلمت ورحت ركبت السيارة ومسكت طريق خريص رايحن للي يبيعون غنم
بشارع سلمان الفارسي وكل الطريق افكر باستغلال الاباء والامهات لنا ماوعيت من نوبه التفكير الاي بطريق اسفلت
صغير مسار واحد بوسط البر واتلفت الا ماحولي احد قلت اكيد هالطريق يودي لقريه وهالقريه بالبر اكيد به غنم
كملت الطريق الا فيه زول شخص يأشر على جال الخط قلت ابوقف له اوصله واكسب اجره وانا صايم يوم قربت الا
الي يأشر اسد واقف على رجلينه المهم وقفت وفتحت دريشة الراكب
قلت : وين يالحبيب
قال : انزل ابيك بموضوع
قلت : وش تبي
قال : انزل ابضاربك
قلت : يارجال اذكر الله انا مابيني وبينك شي
قال : تبي تنزل والا سحبتك على وجهك بالسفلت
قلت : مابقى الاهي بس وخر ابوقف بالتراب
وانا انزل بالتراب وانزله يوم نزلت الاه حاطن يده اليمنى ورى ظهره يوم لمحته الا به قلم ابوريال الي مافيه امل ينكسر
الاه ناوين ينشبه بجبهتي وانا ارجع للسيارة وافتح الدرج واخذ المشرط حق التظليله واجيه ركض والله لايوريكم
ماتشوف الا الدمامين وخذ شيل وحط وكم سلفكس خلفي وكم بقس ويوم تعبنا وانا اتغافله وبالمشرط مع البطن
الا مصارينه بالارض ويقعد يحوس وانا اوجهه للقبله واذتسيه ذتساتن شرعيه وافتح شنطه السيارة واعلق به حبل
وابدى اصلخه الا يوم مروا من عندي اثنين على جيب شاص وانا ااشر لهم ويجون واحلف عليهم الا ينزلون يتغدون
معي قالوا ابشر وانا احمس لهم التسبد

http://www.graaam.com/up/Pic9/19660197b7.gif

الاسد المهايطي الي ذبحته وتم تغطية وجه الجنط لاسباب امنيه

قلت : الا ياجماعة الخير الرياض كم تبعد من هنا
قالوا : اربع وسبعين كيلو
قلت : افاا اجل وش رايكم نتقدم لنا سته كيلو عشان يجوز لي افطر
قالوا : الراي رايك
ونقوم نتقدم لنا سته كيلو همن نزلنا وانا اكب الغدا (بيستانس ابوشدز) وارفع راس الاسد بالشنطه قلت ابهديه لامي
وانا اكبس لهم هاك الكبسه ونتغدى ونعين من الله خير ويوم خلصنا واضبط لهم براد شاهي يحبه قلبك ونتقهوى
قالوا : الا ياللحية الغانمه انت وش جابك هنا
قلت : ابد جاين اشتري ضحايا تدلون لنا احدن قريب يبيع لنا ضحيتين
قالوا : اي والله به قبيله السراسره حلالهم طيب حتى الذبيحه يالله تمشي من النعمه
قلت : اوصفوا لي
قالوا : مايحتاج وصف امش عشره كيلو همن انزل يمين وامش صحراء سبعة كيلو تشوف بيوتهم بذاك
قلت : الله يعطيكم العافيه
وانتفارق انا وياهم وامشي على وصفهم الا يوم وصلت القبيله وادخل واتمشى بشوارعهم الا مادريت الايوم احجرون
وينزلونن من السيارة ويكلبشونن
قلت : وش السالفه ياجماعة الخير
قالوا : لاتكلم ترى اي كلمة تسجل ضدك
قلت : حسناً حسناً أريد محامياً << متعود يقرا الترجمه حقت الافلام
قلت : صدز وين رايحين ووش السالفه
قالوا : حنا رايحين لزعيم القبيله طلمس السرسري والآن انت متهم بقضيه من الدرجه الاولى
سكت انا لين وصلنا بيته اقصد عشته ويوم دخلنا عليه الا ام العبيد جايته معصب وخشمه منفرش زود ووجه يخوف
والسيف بيده قلت افاا يالجنط تخاف المهم

http://www.graaam.com/up/Pic9/57c1e30372.jpg
طلمس السرسري زعيم قبيلة السراسره

قال : وراك تذبح ولدي
قلت : اي ولد
قال : وائل بن طلمس السرسري
واتقطع من الضحك قدامه
قلت : وائل وطلمس خخخخ ماعليش ياحضرة الزعيم بس ما اتوقع بانتاجك واحد يستاهل اسم وائل وجهك ما يساعد
الا يوم حمدز زياده ورفع السيف

http://www.graaam.com/up/Pic9/bba72e28aa.jpg
وائل بن طلمس السرسري

قلت : يابن الحلال اصبر وعلمنا وش السالفه
الا يوم هدا شوي همن
قال : السالفه ان لي ولد اسمه وائل كنت اعده ياخذ زعامة القبيله من بعدي وهالحين الولد مختفي له كم يوم وانا
شوفت عينك كبرت ولا عندي عيال غيره الا بنت وحده ماتقدر تقود القبيله
قلت : طيب انا وش دخلني
قال : مافيه غيرك الي قاتله
قلت : يابن الحلال اذكر الله ماقتلت احد واصلا وش خلاكم تشكون بي من بين الناس
قال : ماقتلت احد والدم الي على صدام سيارتك الوراني
قلت : اهاا هذا السبب
يابن الحلال السالفه ومافيها انه اليوم وقفني اسد وتهاوشت انا واياه وذبحته وعلقته على شنطة السيارة يوم اصلخه
قال : طيب عندك دليل والا ننتظر تحليل DNA
قلت : راس الاسد معي بالشنطة
ويجي يرسل ناس يجيبون الراس الا طلع كلامي صح ويوم شافوا راس الاسد قاموا كلهم يرقصون حتى الزعيم طلمس
ويشيلونن ويحطونن على كرسي الزعيم ويجي الزعيم يفصخ الريش الي على راسه ويحطه على راسي
قلت : وش بكم انتم
قال : انت انسب واحد يقود القبيله وانا اتنازل عن الزعامه لك وابزوجك بنتي رفعه
قلت : طيب وش الي خلاكم تسوون تسذا
قال : انت اشجع واحد بذا وهالاسد الي ذبحته ماقدروا عليه اكبر شجعان القبيله
المهم وانا اعيي وهو يضغط علي بالاخير قلت له الزعامه يمكن بس بنتك اسمح لي اكيد انه تشبهك
قال : اصلا ماتاخذ الزعامه لين تاخذ بنتي لأنه لابد يكون الزعيم من العايله
قلت : خلاص اخذه بس هي تجلس ببيت وانا ببيت
قال : انت اشفه همن عطنا رايك
قلت : على بركة الله
قعدت شوي انا واياه بس ننتظر القهوة الايوم


دخلت هاك البنت


يوم شفته


وانا اعدل جلستي


وابلع ريقي


واعدل الريش الي على راسي


وابدا اطقق اصابعي


وتسلم وتحط القهوه وانا اقز وفاتحن اثمي


اقز

واقز

واقز

وهي مدنقه

مواصفات تووووووووووووب

بياض وزين وجسم . . . الخ

المهم
قامت واطلعت وانا التفت عليه
قلت : يخرب بيتك صدز ذي بنتك
قال : ايه بس امه فرنسيه
قلت : يالله عشر دقايق ابتروش همن ابدخل على مرتي
قعد يضحك وقال ابشر ياحضرة الزعيم عاد دخلت عليه في بيتنا الجديد الي صار بيت الزعامه ويم دخلت عييت
لا اطلع اول ثلاثت ايام خلون على راحتي همن بدوا يطقون علي وانا مزلب ابوهم ولا ارد << نايم بالعسل
وصار جدولي كله نوم واكل نوم واكل الا يوم الاثنين يصير جدولي اكل ونوم اكل ونوم
المهم مر على هالحاله شهر وخالي طلمس قفلت معه ضاعت امور القبيله وتدهور اقتصاد القبيله الايوم جاء ذاك
اليوم الاسود مادريت وانا مقيل انا ورفعه الايوم انكسر باب الغرفه وافز من السرير الاه خالي معه خيزرانه اطول
منه والشر بعيونه عاد من قرادة حظي اني صرت لابسن هاك الحزة قميص قطن خفيف ولا لبست تحته فنيله
ولاقال شي على طول بدا جلد مع كل جهه لما غديت جنازة ويستلم رفعه بعدي ويجرجره مع جدايله لم بيته
وياخذ مني الريش يوم جاء العصر وانا اروح لمه قلت ابستسمح منه واول مادخلت
قال : عمري اشوفك معتبن عندنا احش رجلك حش يالله اندزلع معك ساعه بس وان شفناك بالقبيله بعده
بنذبحك واجي اهج واركب السيارة قلت مانبي زعامه دام الدعوه تسذا وانكس للرياض يوم جيت للبيت اول مادخلت
واقابل امي بالحوش
قالت : تبي انتسب لك عشا << مافقدتن!! (hjh) انواع الجفاف العاطفي
قلت : يامال العويفيه يا اميمتي مابي شي ابروح انام



خلاص انتهت

دمتم باحلى ابتسامه

جنط السفينة