كثر ماللفرح بسمه كثر ماللحزن الوان..(صالح السكيبي)

[مستور]

الاخوة الزملاء

اليكم قصيده شاعرها غرد بشاعر المليون النسخه الاولى

اتفق الكثير وراهن على وصوله لمراحل متقدمه ولكن للاسف الطريقه التي

تتم فيها اختيار شاعر المليون تضلم احيا ناً شعراء فحول امثال شاعرنا صالح السكيبي

كثرماللفرح بسمه كثرماللحزن الوان = كثرما تكسر الدمعه شموخ الذات وتذله
كثرماللسهرمرسى بجفن العاشق الحيران= كثرما للنوى قصه معه والراوي المله!!
كثرما لوعة الفرقا تشاف وتنقري وتبان= على وجه المفارق والجروح قدام ومجله
كثر ما اشقت الغربه مسافر راجعٍ ولهان= كثر ما حن لبلاده كثر ما فيه من عله
كثرما يبتسم طفلٍ نهار العيد به فرحان= كثر دمع السحاب اليا سقى خد الثرى غله
كثرما للوصل نبره يجاوبها صدى الحرمان= كثر ما صبري الموحش تعبت اسقيه وآعله
كثرمااحبك احبك شقاي وراحة الوجدان= غلاك اللي نهب قلبي ولا له حد ياصل(له)
فديت المبسم اللي لا تبسم ينطق الرمان = فديت عيونك اللي في هدبها تبتسم طفله
احبك وان رضى الراضي ولو هو يزعل الزعلان=واحبك كثر ما رمشك يصافح وجنتك ظله
حبيبي وقتي الماضي عرف وش قيمة النسيان=عرفتك وانجلى همٍ حجاجه دوم منفله
هويتك والبشر عندي عقب عرفك غدو سيان=وانا يا منوتي ماني لغيرك ملتفت لله
طلبتك كان لي قلبٍ معك ضايع بلا عنوان=اما نه تتركه ضايع معك ارجوك لا تدله!!



تحيتي وتقديري لكافة الزملاء

[noor]

(http://bsmlh.net/up/uploads/bsmlh_b3e4c2c89c.jpg)
اتذكره السكيبي شاعر رومانسي وهادي جدا
اشكر لك النقل للمميز اخوي مستور

[مستور]

حياك الله اختي نور واذكر ان الدكتور غسان قال عن احد قصائده هذه القصيده من اجمل ماقرأت في شعر النبط
تحيتي لك

[ابوشدق]

قصيده رائعه جدا
صح لسان الشاعر
وتسلم يمينك يابوماجد

[مستور]

هلا بك اخوي ابو شدق
سلمت يالغلا وصح لسان الشاعر
تحيتي لك

[mr.nana]

صح لسانك ولو به بيرق كان عطيناك اياو
ماشالله عليك

[المُهرة]

الله الله
صح لسان السكيبي على هالرائعة
وتسلم يابو ماجد على هالأختيار الطيب ويسلم ذوووقك
اما شاعر المليون فغسلنا يدينا منه عقب الغبن اللي شفنا ض4

[مستور]

صح لسانك ولو به بيرق كان عطيناك اياو
ماشالله عليك

صح بدنك وهذا من ذوقك ولكن لايصير مثل بيرق شاعر المليون صاحب الاحقيه حسب تقييم اللجنه يصبح الخامس
تحيتي لك وتقديري

[مستور]

الله الله
صح لسان السكيبي على هالرائعة
وتسلم يابو ماجد على هالأختيار الطيب ويسلم ذوووقك
اما شاعر المليون فغسلنا يدينا منه عقب الغبن اللي شفنا ض4

صح بدنك وصح لسان شاعرنا السكيبي
وشاعر المليون من خروج السكيبي العام الماضي اعطى مؤشر غير سليم لاتجاه المسابقه
تحيتيلك وتقديري

[الغلا كله]

اختيار رائع يا مستور ..

ما أنكر قريتها مره وثنتين وثلاث ..

نظم في غاية الرقة والعذوبة .. وللاسف أول مره اقراها أو اسمع عن السكيبي ..

احتفظت فيها على جهازي ..

تستحق التقييم على هالاختيار الفاخر ..

[مستور]

الغلا كله
حياك الله والسكيبي شاعر بكل معنى الكلمه
وبما انك اول مرة تسمعين عنه اقرأي الابداع هنا


هذا ثمر قلبي تدلى قبل .. يأتي موسمه=مدي يدينك واجمعي فرقاك من عذق العتب

أنا ثملت من الفراق اللي خذا وجهي سمه=شوفي ملامح غيبتك تقرا قبل لاتنكتب

في وجهي الشاحب وفي آهات صدري ونسمه=في ناضر عيون ٍ هميل الوجد منها ينسكب

يا نور لحظات ٍ غدت من دون وجهك معتمه=وينك؟بدا هذا الحنين بجوف صدري يحتطب



ياحب ٍ إجتاح الضلوع وفج قلبي وقسمه=نصفين..وأزريت اجمع النصفين وغيابك سبب!

حب ٍ بقى لو واقعه مره بحاليه.. صدمه=عشق ٍ حيا رغم العطش في روض روحي معتشب

ليت الغلا ذنب ٍ تجناه الخفوق ويندمه=وليت الصبر جرم ٍ اليا طاولت همي يرتكب!

إلى متى وأنا اهين الوقت وأرجع واحشمه=وأنا على رجم الوصال اشرف.. وأنادي.. وأرتقب

ياأم العيون الفاترات الناجلات المغرمه=يا من رموش عيونها تشكي سبب عكش الهدب

يامبسم ٍ له ضحكة ٍ تنطق بشي ٍ تبهمه=يانبرة ٍ لامن حكت كل المعاني تنقلب

ياللي خذيتي خافقي قبل اعرفك واقدمه=ياللي غيابك لحن ٍ تغني به أعواد القصب

عودي على قلب ٍ طواه الهم والشوق هزمه=قلب ٍ معك غنايمه ضاعت ولاادري وش كسب؟

أنا انتهيت وشوقي بصدري بدت له همهمه=جمر انتظاري سَمدت ناره وانا صرت الحطب

حتى ثمر قلبي تدلى قبل ياتي موسمه=هزي طرف جذعه تساقط لك من عذوقه عتب!




تحيتي لك وتقديري

[الغلا كله]

الله .. الله .. يا شاعرنا ..

صح لسانه ملايين .. وعسى يمينك تحرم على النار ..

شاعر رقيق الكلمة .. عذب القافية .. سلس المعاني ..

تحس باختياره لحرف الباء في نهايتها هدوء .. وزود عتب من زود الغلا .. وصمت ..

الله يحفظه ويطول بعمره .. ويحفظك لنا على رائع اختيارك ..

تم انشاء ملف خاص له فى الجهاز .. شاكرة لك اضافتك الأكثر من رائعه ..

[مستور]

الغلا كله
مرحبا بك
تحيتي لك وتقديري

[دوا غسيل]

ذائقتك تتسم بالروعة والجمال لأنها تحمل لنا قصائداً ليست كالقصائد تحمل جزالة الكلمة في رقة المعنى
قصيدة جداً رائعة تستحق أن تقرأ وتقرأ حين يصيبنا العطش الأدبي لأنها حتماً ستروينا من كلماتها وأبياتها

سملت دائماً وأبداً

<< يترياك في رائعة ثانية << متأثر من شاعر المليونهـ3

[مستور]

ذائقتك تتسم بالروعة والجمال لأنها تحمل لنا قصائداً ليست كالقصائد تحمل جزالة الكلمة في رقة المعنى

قصيدة جداً رائعة تستحق أن تقرأ وتقرأ حين يصيبنا العطش الأدبي لأنها حتماً ستروينا من كلماتها وأبياتها

سملت دائماً وأبداً


<< يترياك في رائعة ثانية << متأثر من شاعر المليونهـ3


تسلم يالغالي وتشرفت بمرورك وانا مع الاسف غير متابع للقصائد ولكن الجزل يفرض نفسه وهذا ماتجلى بقصائد السكيبي
تحيتي لك وتقديري

[كاتم الونة]

الله الله

صح لسانه ملايين شاعرنا الكبير/ صالح السكيبي

":"

نعم هذا الشاعر من اوائل المظلومين في شاعر المليون..!!!

لكن يبقى في القلوووب

":"

تسلم يمينك يالغلاااااااااا

اختيار قمة في الذوق والفخامة

المحب:)